برمنگھم برطانیہ میں جشن آزادی اور معرکہ حق کی فتح کو منانے کے لیے “اسپرٹ آف پاکستان” میلہ کا آغار

برمنگھم (نمائندہ خصوصی) برطانیہ میں پاکستان کے ہائی کمشنر ڈاکٹر محمد فیصل نے اپنی شریک حیات ڈاکٹر سارہ نعیم کے ہمراہ برمنگھم میں “اسپرٹ آف پاکستان” یوم آزادی کی تقریبات کا افتتاح کیا۔ برمنگھم میں پاکستان کے قونصلیٹ جنرل کے زیر اہتمام 8 سے 15 اگست تک جاری رہنے والا ہفتہ بھر کا میلہ برطانیہ کی ثقافت میں برطانوی پاکستانیوں کے گہرے تعاون کی نمائش کے لیے وقف ہے۔ اسپرٹ آف پاکستان” کا مقصد آپریشن بنیان مرصوص کی کامیابی کا جشن منانا اور پاکستان کی بہادر مسلح افواج کو خراج تحسین پیش کرنا بھی ہے۔

افتتاحی تقریب میں بیرونس شائستہ گوہر او بی ای، پالیٹ ہیملٹن ایم پی؛ طاہر علی ایم پی؛ ایوب خان ایم پی؛ سابق ایم پی خالد محمود، برمنگھم کے لارڈ میئر ظفر اقبال ایم بی ای؛ چیئر “سپیرٹ آف پاکستان” کونسلر وسیم ظفر ایم بی ای؛ ویسٹ مڈلینڈز کے میئر، رچرڈ پارکر؛ برمنگھم سٹی یونیورسٹی کے وائس چانسلر پروفیسر ڈیوڈ مبا۔ کمیونٹی رہنماؤں، پیشہ ور افراد، کاروباری شخصیات، تاجروں، سفارت کاروں، پاکستان کے دوست اور برمنگھم میں مقیم پاکستانیوں کی بڑی تعداد نے تقریب میں شرکت کی۔
اپنے کلیدی خطاب میں ہائی کمشنر ڈاکٹر محمد فیصل نے پاکستانی تارکین وطن کے درمیان اتحاد کی اہمیت اور برطانوی سماج میں انضمام کو بڑھانے پر زور دیا۔ انہوں نے کہا کہ “اسپرٹ آف پاکستان” منانے کا مقصد نہ صرف پاکستان کی بھرپور ثقافت کو اجاگر کرنا ہے بلکہ برطانیہ میں پاکستانیوں کی خدمات اور کامیابیوں کو بھی منانا ہے۔ ڈاکٹر فیصل نے کہا کہ یہ میلہ برطانیہ میں مقیم 1.7 ملین سے زیادہ متحرک پاکستانی کمیونٹی کو اجاگر کرنے والا ایک تاریخی اقدام ہے۔ ہائی کمشنر نے کہا کہ برطانوی پاکستانی برطانیہ میں ہر شعبے بشمول کاروبار، سیاست، تعلیم اور عوامی خدمت میں نمایاں کردار ادا کرتے ہیں۔

تقریب سے برطانوی پارلیمنٹرینز اور کمیونٹی رہنماؤں نے بھی خطاب کیا۔ انہوں نے کمیونٹی کی فلاح و بہبود کے لیے برٹش پاکستانیوں کی مثبت شراکت اور خدمات کا اعتراف کیا۔ انہوں نے برطانیہ میں اقلیتوں کے بارے میں پھیلائی جانے والی غلط معلومات کی نفی کرنے کی ضرورت پر بھی زور دیا جو پرامن برادریوں میں تقسیم کا باعث بنتے ہیں۔ “اسپرٹ آف پاکستان” میلہ دیگر ایونٹس پر مشتمل ہے جس میں دلکش آرٹ کی نمائشیں، موسیقی، کھیلوں کے مقابلے اور برمنگھم میں متحرک ثقافتی میلے شامل ہیں۔