پاور ڈویژن کی جانب سے صارفین کو بہتر سہولیات اور نظام کی کارکردگی میں بہتری کے لیے سمارٹ میٹرنگ اصلاحات کا آغاز

اسلام آباد(زاہد یعقوب خواجہ): پاور ڈویژن نے ملک کی بجلی کی تقسیم کار کمپنیوں (ڈسکوز) میں سمارٹ میٹرز کے بڑے پیمانے پر نفاذ کے ذریعے صارفین کو خدمات کی فراہمی میں بہتری اور نظام میں عملی کارکردگی کو مؤثر بنانے کے لیے ایک اہم اقدام اٹھایا ہے۔ پاور ڈویژن کے ترجمان نے کہا کہ نیٹ میٹرنگ صارف اور ادارے کے درمیان بنیادی رابطے کا کردار ادا کرتی ہے۔ وزارت کی جانب سے مالی سال 2025-26 کو ’’کسٹمر سروس امپروومنٹ کا سال‘‘ قرار دیے جانے کے تناظر میں ڈسکوز نے اپنے انفراسٹرکچر کو جدید خطوط پر استوار کرنے کے لیے ایک جامع ڈیجیٹلائزیشن پروگرام شروع کر دیا ہے۔ اس اقدام کا مقصد ریئل ٹائم میں ڈیٹا تک رسائی، شفافیت میں اضافہ اور صارف کے مجموعی تجربے کو بہتر بنانا ہے۔
ترجمان نے بتایا کہ سمارٹ میٹرز کی قیمتیں اس اصلاحاتی عمل میں ایک بڑی رکاوٹ سمجھی جا رہی تھیں، جس پر پاور ڈویژن نے براہ راست مداخلت کرتے ہوئے لاگت کو معقول بنانے کے اقدامات کیے۔ ملک بھر میں تقریباً 3 کروڑ 80 لاکھ بجلی صارفین میں سے تقریباً 80 فیصد سنگل فیز صارفین ہیں۔ حالیہ عرصے تک سنگل فیز سمارٹ میٹر کی قیمت تقریباً 20 ہزار روپے فی میٹر تھی، جو بین الاقوامی معیار کے مقابلے میں خاصی زیادہ تھی۔ شفاف اور مسابقتی خریداری کے عمل، حکومتی مداخلت اور مسلسل نگرانی کے نتیجے میں یہ قیمت کم ہو کر تقریباً 15 ہزار روپے فی میٹر تک لائی جا چکی ہے۔
ترجمان کے مطابق، صرف اس مالی اصلاح سے ہی سالانہ بنیادوں پر قومی سطح پر تقریباً 25 ارب روپے کی بچت متوقع ہے، بشرطیکہ سالانہ 50 لاکھ میٹرز کی تبدیلی کا عمل جاری رکھا جائے۔ میٹر کی قیمت میں کمی کے باعث نئے سمارٹ میٹر حاصل کرنے والے صارفین پر مالی دباؤ میں واضح کمی آئے گی اور یہ ٹیکنالوجی نسبتاً کم لاگت پر دستیاب ہو سکے گی۔ مزید یہ کہ توقع ہے کہ آنے والے بین الاقوامی مسابقتی ٹینڈرز کے بعد قیمتوں میں مزید کمی واقع ہوگی۔
ترجمان نے مزید کہا کہ اس اقدام سے انسانی مداخلت کم ہو جائے گی اور میٹر ریڈنگ کے عمل میں نمایاں بہتری آئے گی۔ خودکار اور ریموٹ ریڈنگ نہ صرف درستگی میں اضافہ کرے گی بلکہ بلنگ کے نظام پر صارف کے اعتماد کو بھی مضبوط بنائے گی۔ مینوئل ریڈنگ کے خاتمے سے غلط، مشکوک یا تنازع کا باعث بننے والی ریڈنگز کے دیرینہ مسائل میں واضح کمی آئے گی، جس سے صارفین اور متعلقہ ڈسکوز کے درمیان تعلق زیادہ شفاف اور قابل اعتماد ہوگا۔
سمارٹ میٹرز کی تنصیب کے بعد صارفین جدید فیچرز سے آراستہ موبائل ایپلیکیشنز کے ذریعے اپنی بجلی کے استعمال کو حقیقی وقت میں مانیٹر کر سکیں گے۔ اس سے صارفین کو اپنی توانائی کے استعمال پر بہتر کنٹرول حاصل ہوگا اور وہ بجلی کے اخراجات کو زیادہ ذمہ داری سے مینیج کر سکیں گے۔
صارفین کے لیے نمایاں فوائد:
• بجلی کے استعمال کی حقیقی وقت میں نگرانی کی سہولت
• توانائی کے استعمال اور بلنگ پر زیادہ مؤثر کنٹرول
• درست اور ٹمپر پروف (چھیڑ چھاڑ سے محفوظ) میٹر ریڈنگ
• پری پیڈ میٹرنگ سروسز کے مستقبل میں نفاذ کی راہ ہموار ہونا
ڈسکوز کے لیے نمایاں فوائد:
• میٹر کی ریموٹ ریڈنگ اور بلنگ میں زیادہ درستگی
• بلنگ اور شکایات کے ازالے کے عمل میں تیز رفتاری
• بجلی کے نیٹ ورک پر بہتر نگرانی اور کنٹرول
• فالٹ اور بجلی کی بندش کی بروقت نشاندہی اور جلد بحالی
• آپریشنل مینجمنٹ اور سیفٹی کے معیار میں بہتری
یہ اقدام پاکستان کے بجلی کے شعبے کو ڈیجیٹلائز کرنے اور صارف کو شفاف، تیز اور سہولت پر مبنی خدمات فراہم کرنے کے لیے پاور ڈویژن کی جاری کوششوں میں ایک اہم سنگ میل کی حیثیت رکھتا ہے۔ یہ بجلی کی تقسیم کے نظام کی ڈیجیٹل منتقلی کی جانب ایک کلیدی قدم ہے اور حکومتِ پاکستان کے پاور سیکٹر ریفارم ایجنڈا کا ایک بنیادی حصہ ہے۔